مباحث التموين هرجله ليس لها معنى
شباب الثوره ختو الكوره واطه
زيادة عباس زياده
وغرقت الخرطوم في شبر مويه
ماهو الفرق بين الفاتح عزالدين حاتم السر ومدني عباس مدني
القبض علي مدير الشرطه الاسبق هاشم عثمان الحسين
حسب علمى البسيط مباحث التموين تعمل على مراقبه السلع وانسيابها ا لى المواطنين وضبط الاسوق لكن في السودان شى اخر ( اقبض – اسجن – ادفع ) دار الحديث ( قمتى) في شباب معتقلين داخل وزاره التجاره (شمشمنا) اتاكدنا من الخبر( اربعه أيام بالتمام والكمال ) داخل وزاره التجار في مكاتب الصادر وتحديداً في الغرف 3و5
هل هذه الغرف مصدق لها بالاعتقال وحبس رجال الاعمال بها و تفتيش تلفوناتهم وحجزها …
نشرنا الكلام بي جاي تم تحويلهم فورأ للقسم الشمالى التهمه تخريب الاقتصاد الوطنى ( اصلاً هو مخروب جاهز) فتح بلاغات تحت الماده (57 أ ) الماده باختصار لا تنطبق عليهم لان المصدر بيعمل فورم صادر من البنك المركزى عبر بنكو التجارى وده بمثابه رخصه رسميه طيب (ندمس ) الماده دخل مباحث التموين ببنك السودان بالضرائب والزكاه شنو.؟
مع العلم انو الجهات دى كلها عندها نيابات متخصصه. تخريب الاقتصاد عندو نيابه خاصه ( نيابه الجرائم الموجه ضد الدوله ) والامن الاقتصادى الذى احسبه اكثر درايه ومعرفه من هرجله مباحث التموين الان (وتانى بجى صادى بي مهله )
اكثر من الف سؤال هل الجهات العدليه ممثله في وزير العدل زير الدخليه والنائب العام ومدير عام الشرطه لديها علم بالذى يجرى الان بوزاره التجاره؟ ولو ما عارفين الاحسن نشوف لينا سقاله نطلع فوقها ( ولا ما كده ياوداد)
شباب الثوره كل أسبوع مسيره تعطيل واعاقه الحياه اليوميه لى عامه الشعب واكثر المتضررين أصحاب الدخل المحدود تم توكيل تجمع المهنيين الذى وضع يده في يد الأحزاب التي كانت مشاركه في حكم المخلوع هللوا وكبروا وقالو حكومه ( كفوات) وطلع كلامهم صح وشوفنا الشمس في عز الليل وانتو كل يوم في مسيره في قفا مسيره.. رفع استعداد القوات الامنيه قفل الكبارى وانتو الخاسرين (البمبان ) من قروشكم خلوهم في عواستهم وانتو عمروا وجهزوا ل الانتخابات الجايه كان جاتكم زاتو.
رجل اعمال شاب تم اعتقاله من يوم 17/7 من قبل مباحث التموين الماده (57 أ)واودع حراسه القسم الشمالى مع التوصيه الجامده من عمك بعدم الزياره ومنع التلفونات عنه ووضعه في الحراسه العامه نع معتادي الاجرام وطلب منه كثيرمن الافادات من جميع الجهات الايراديه مع العلم ان المقبوض عليه ليس متهم في (130 قتل ) وحتى لو مدان تعتبر جريمه ماليه يكرم الرجل بوضعه في المكان المناسب باعتباره ليس مجرم .
وانبه الساده المصدرين ان الذى يحدث الان غدا سوف يجري عليهم فردآ فردآ بنفس السناريو في ظل عدم فهم القوانين .
مدنى عباس مدنى منذ توليه المنصب نتسال ماهو الشى الذى قدمه للمواطنين؟ هل تم توفير قوت المواطنين؟ رفع سعر العيش من جنيه لى اثنان جنيه وخمسه جنيه، المحروقات زياده كل ما تصبح.. وكل يوم تنعدم سلعه من السوق… قفلت الصادر وضيعت اموال تجار بالجمله، منعت صادر الفول ، اخرجتنا من بورصه السمسم كل قراراتك للوضع الاقتصادى ( غلط ) انت تعمل على اخراج ماتبقى من روح في الاقتصاد السودانى( تنح وارح واستريح)
كا العاده ولا جديد يزكر البلد غرقت من اول مطره لا فتح مجارى تم ولا تطهير مصارف ولا فتح جداول وحتى التي تم العمل لها ترك التراب خارجها ومع اول مطر رجعت (بر دولوب) تانى جوه
المهم نحنا غرقنا والحمد لله لكن عليكم الله جهزوا للخريف الجاى من اسى عشان مانتفاجأ زى مفاجئتنا حقت اسى .
ماهو الفرق بين الفاتح عزالدين وحاتم السر ومدنى لا يوجود فرق الأول بتاع ( رب رب رب) الثانى قال ( الناس تانى الا تقيف صف في الصلاه ) الثالث قال قبل سته شهور( أسبوع بحل ازمه الخبز ) أهلنا بقولو للاعوار ( كريم عين) دحين بالواضح كده كلهم (كضاااااااااااااااابين )
ناس الغرف التجاريه والمصدرين قاعدين للتصريح والنقه في الفارغه والمقدوده جهزتوا كشوفات الأعضاء والميزانيه للدعوه للانتخابات؟ ولا كلو سواقه (بالدقداق ) لمن ضهرنا وجعنا عليكم النبي امسكو خشمكم عليكم وقضوا المهمه (التكم ) وكفو عن النضمي النى الذى لا يحل ولا يربط.
الدولار في ارتفاع جنونى والبلد في تدهورمريع واشاعات تملأ الاسافير وكلو نجر في نجر والبلد بقت زى أهلنا الشوايقه نصفق وراجعين لى وراء .
الانفلات الامنى الذى يحدث الان هو نتاج تراخى القوات الامنيه في ضبط الشارع وتدفق اللاجئين ونتوقع انفلاتات أكبر.. الحسم في ضبط الشارع وبسرعه مطلوب لعوده الطمأنينة للمواطنين .
إلى متي يظل الناس في صمت عن دم الشهداء بعد ان (حدث ماحدث ) اين تقرير فض الاعتصام؟ اصحا يابريش .
بعد طول غياب اعتقال الفريق اول شرطه هاشم عثمان الحسين حتي اللحظه لا اعرف التهمه لكن الرجل كان مدير المخلوع ثم مديرأ للشرطه ثم ولي للخرطوم ورئس الموتمر الاوطني بالولاية يخيل لي ديل كانو كفايه جدأ للقبض عليه لكن ( المحاصصات والاتفاقات والحصانات والوعود التي قطعت لهم ) ظنو انهم في مامن من الملاحقة القانونية هاشم عثمان شرد كل كفات الشرطه انكرب التقيل جاي ورا.
ولى عوده بحول الله
التعليقات مغلقة.