يستعد عدد من نجوم السودان في مجالات الشعر والموسيقى والاعلام لاطلاق الاوبريت الوطني الجديد (لحظة براح) الذي يعد من اكبر الاعمال الفنية في الفترة الاخيرة وهو من كلمات الاستاذ الشاعر علي الفحل والحان وتوزيع موسيقي الموسيقار محمد حامد جوار ويشارك فيه نخبة من الفنانين والفنانات من اجيال غنائية مختلفة بقيادة الفنان الهادي حامد ود الجبل والفنان ابوبكر سيد احمد والفنان هاني عابدين والفنانة رفيعة احمد والفنانة مهى عبد العزيز والفنانة اكرام فضل.
وقال الشاعر علي الفحل ان البروفات قد اكتملت بمشاركة كبيرة من المطربين من المشاركين في الاوبريت بصالة البروفات بمباني اتحاد المهن الموسيقية بشارع النيل ام درمان ومن المتوقع ان يتم تسجيل العمل بتقنيات الصوت في استديو الاذاعة الطبية ثم بعد ذلك وعلى حسب رؤية المخرج الكبير شكر الله خلف الله سيتم تصوير عدد من المشاهد السياحية بمشاركة الفنانين داخل مدينة الخرطوم نسبة لظروف جائحة كورونا وستقوم نجمة الشاشة الاعلامية اسراء عادل بعمل المقدمة للاوبريت وقراءة النص الشعري بمشاركة الاعلامي موسى عبد القادر ومن المتوقع ان يتم المونتاج قبل نهاية شهر رمضان ليعرض المشروع الوطني الغنائي الكبير على شاشة تلفزيون السودان وقناة النيل الازرق خلال ايام عيد الفطر المبارك كهدية للوطن وللشعب السوداني العظيم.
ويبرز الاوبريت الامكنة الجمالية والسياحة والتاريخية في بلاد النيلين ويشارك في انتاج الاوبريت عدد من السودانيين من الداخل والخارج منهم الناشط الاجتماعي والدينمو المحرك وسط الجالية السودانية بالرياض
سمير عبد المطلب وسعادة الفريق شرطة الرشيد موسى الزين وسعادة اللواء شرطة يحى محمد احمد النور و الاعلامي الجيلي محمد الحسن بالرياض السعودية ورجل الاعمال الاستاذ مدثر كنة ورجل الاعمال الاستاذ سر الختم محمد احمد و رجل الاعمال الاستاذ محمد المبارك البشير الطاهر حمودة والاعلامي الشاب وضاح والدكتور صلاح حميدة المستشار بالمستشفى العسكري بالرياض السعودية والدكتور سفيان المرضي الشيخ.
وتقول كلمات الاوبريت :
ياربي بعد الحال كمان
حال البلد يصبح سمح
لا زول يهم
لا خير عدم
لا زول شكى
لا زول يوح
لا يئن جرح
كل البيوت الضلمت
للبهجة غنت سلمت
ترجع تقالد للشروق
البال يروق والفال صبح
والبسمة لوجوه الجميع
(قدلة ربيع)
راجع سريع
ترقص مدن
بالشوق معانا اتكلمت
والعازة في لحظة براح
تتناسى لي كل الجراح
ولي اي ساعة اتألمت
والخوف يزح
ياربي بعد الحال كمان
حال البلد يصبح سمح
نسرج خيول عز الفهم
نطرد وهم
والنيل يفيض
والخير يزيد
ونضيف رقم
خلونا يا الحبان حنان
باكر يعدي الامتحان
ونحقق الهدف المحال
همومنا لو صبحت جبال
باصرارنا حانزيلا ونهد
تشرع مراكبنا بأمان
ولي كل نوافذ الشك نسد
للريد نعد
بالحب نمش
خطوة ونمد
مابننكمش
نحصد زرة وعباد شمس
سمسم قطن والحال يمش
والخير كتير
( خضره ونخيل) فاكهة وقمح
ياربي بعد الحال كمان
حال البلد يصبح سمح
ياشعب طموح
مليان شموخ
زادك وفير
نفزع نفير
والخير كتير
قلمك كتب
غنى ورسم
معنى الادب
سيفك سلاح
داخرنو للزمن الكعب
دقو الطبول
نادو الجميع ماتخلو زول
كوسو الفرح وين مايكون
لو يقسى دربو وكان يطول
العازة ترجع للغنا
والغيم يغازل في السهول
والموج يداعب في الضفاف
اهلي الحنان ناسي الرهاف
خلونا نتكاتف سوا
( واجب الوطن )
مابدور شرح
ياربي بعد الحال كمان
حال البلد يصبح سمح
اخدو العبر واستلهمو
ولي كل شي اتفهمو
وبين الصفوف اتقدمو
هيا العمل هيا الكفاح
بي سماحة واندياح
وبانتمانا للفلاح
نحصد ثمار كل النجاح
وللعازة تاج بنقدمو
ومهما الأيام تقسى وتطوف
من الظروف إتعلمو
ارض الرجال عزة وكمال
لا بشكو حال لا بنضمو
امشي ماهماك أزيز
يازول عزيز وطنك ربح
ياربي بعد الحال كمان
حال البلد يصبح سمح
شبابنا يانبض الوطن
وياجنودنا في الميدان اسود
طلابنا في الجامعات حباب
ياشوكة في عين الحسود
زراعنا يا امل البلد
ماتسيبو ضفة ولا نفود
عمالنا صناع الفرح
عرق الجبين بالضو يعود
اطبانا بيهم حال يطيب
يابسمة بتقالد الحشود
يامهندسين ويا مدرسين
فوق عودنا ما حاندي عود
واعلامنا ياعلم البلد
نتمنى نجمك في صعود
بالقومية تترسخ قيم
عصر التسامح لو يسود
ياالساسة اصلو الحب وطن
مبدانا في كل البنود
شيوخنا يانار العلم
يادعوة في الليل والسجود
بلدنا مايقابل تعب
رحماكا يارب ياودود
مابنرضى لي بلادنا الكعب
ودروبنا يارحمن تصح
ياربي بعد الحال كمان
حال البلد يصبح سمح
التعليقات مغلقة.