العيد – عبدالوهاب هلاوي

*العيد ده لو ما علمك ..*
*تكبر علي جراحك .. تسامح الالمك*
*لا يبقي مر العيد عليك*
*لا دق بابك وغنا ليك ..*
*لا سمعتو صوتو وكلمك ..*

*العيد ده لو ما علمك*
*تتسامي فوق كل الصغاير والكلام ..*
*وتعدي زي سرب الحمام..*
*تجدع جناحك في الضلام*
*كانو لا العيد .. مر بيك ..*
*كانو لا عارف العلي*
*وكانو لا عارفّ العليك..*
*لا سالمك ..*
*لا ناغمك ..*
*واهو انت لسه في عالمك*

*العيد ده لو ما صحا خاطرك وجرجرك*
*والعيد ده لو ما فكرك ..*
*كانو لا اتذكرنو .. لا اتذكرك ..*
*كانو لا العيد مر بيك ..*
*كانو لا شافك ..*
*ولا سلم عليك وكان نفسو*
*طعمة سكرك ..*

*العيد ده لو ما وشوشك ..*
*شماك غمامه ..*
*ورشرشك*
*ضماك يمامه* *وعشعشك*
*العيد ده لو ما حركك ..*
*ما فتشك ..*
*كانو لا العيد لمه فيك ..*
*كانو عمرك وعدي بيك ..*
*لا رتبك .. لا نظمك ..*
*والعيد ده لو ما علمك ..*
*تكبر علي جراحك .. تسامح الالمك*
*لا يبقي مر العيد عليك*
*لا دق بابك .. وغنا ليك*
*بس شفت صبحو .. وضلمك ..*

*عبدالوهاب هلاوي ..*
*صباح اول ايام عيد الفطر* 2020